【Now財經台】截至早上11時止，1小時内《彭博》用戶關注度上升最多港股，依次為阿里巴巴(09888)、碧桂園(02007)、友邦保險(01299)、騰訊控股(00700)及滙豐控股(00005)。
滙控今日除淨，集團8月1日出完業績後，股價衝高回落，喺美息有可能快見頂，以及歐美銀行業傳出唔少利淡消息下，滙控股價向上動力仲有幾大？
椽盛資本投資總監曾永堅認為，滙控股價短期上升動力有限，如果考慮等派息呢個因素買入，就要等到10月睇下有冇得派股息，滙控股價由今年3月左右嘅49元水平，反覆升到66元水平，呢浸升幅已反映咗唔少利好因素，包括上半年業績受惠於淨息差、歐美加息環境，以及亞洲業務回復增長，更重要係，集團上調有形資本回報至15%，若維持到派息比率，有機會增加派息。
