【now.com財經】噚日揀咗隻恒指熊(68293)出嚟，用咗大約一個鐘頭借五分鐘圖嘅Slow STC(14,3)完成咗一次Swing Trade，呢一注平均賺幅有8格或16%，夠飲杯紅豆冰。其實之後指數都有再向下運行，目標設定以小時圖10線嘅話，下半場2點至3點呢度時間見粒燭都有穿過條10線，即證明咗喺呢個鐘頭內指數係有穿過10線。以10線為18,446點計，其實喺2點之後首20分鐘指數係低過呢個水平，以達標而走隻(68293)的話，按期內(68293)高低位做過0.069元/0.065元計，平均走貨價為0.067元，用返噚日嘅平均買入價0.05元比的話，以達標走(68293)平均賺幅有17格或34%，比起噚日用一小時行一趟Swing嘅收獲多咗一倍，值得嘅。(呢一注將會以兩個可獲利幅度嘅平均數計入【月度報告】)
今朝恒指開市又嚟見升勢，開市升191點，報18,671點。可惜，爛泥始終都係爛泥，扶唔上柄都真係咩都講唔過去。依家9點43分見指數升幅一度收窄至得130幾點，依家有返140點升幅，18,619點。
換個小時圖上見，指數自7月6日裂口低開+爭三點「平頂」出現後，至今彷彿行咗個「三角形」出嚟，再加埋保歷加通道口收窄，咁啱啦，因為「三角形」同保歷加通道口收窄背後都係有同一個意思，就係好淡爭持/上落格局，依家好明顯可以做嘅事只有一樣：等。呢啲位出倉落場同買大細一樣架咋。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
