【now.com財經】上星期五(7月7日)喺下半場開下就揀咗隻港交所(00388)嘅熊證(68282)出嚟，諗住借五分鐘圖Slow STC(14,3) Swing Trade一趟就收工。可惜最後Slow STC(14,3)兩線都未能上到超買就已經掉頭向下，策略上(68282)出唔到。唔緊要，反正亦都有講過港交所日線圖喺上個星期五低位見280.8元，同5月底嘅低位282.2元相約，形態上雖然唔係一個「圓頂」，不過兩隻腳仔同步都喺一個差唔多嘅水平見下影線，底線生成，再大膽沽港交所落去嘅話，都真係要過咗條底線先比較穩陣。
仲有1分鐘先至完U，睇咗個牛熊證街貨圖先。見今日兩邊都未有新增街貨層出現，而牛證第一層見到有唔少勇士進場，將第一層街貨18,200至18,299點儲到上過千張期指街貨；另外，齊口點數嘅18,000至18,099點亦如預期見過千張期指街貨。至於熊證方面，第一層見19,000至19,099點，同現價真係爭十萬八千里，而呢層有相當於495張期指街貨，的確係比對家嘅牛證少，咁足以反映到大家博反彈嘅心態。
恒指今日亦不負大家所托，開市升381點，開市報18,747點，呢口價將指數由原先靠近牛證重貨區變成迫返上靠近熊證街貨層，上個星期恒指鯨吞咗逾5,000張期指，假如未夠飽而又要再掃街貨的，怕且都未必死衝爛衝上去熊證嗰邊，因為如果要將第一層嘅熊證19,000至19,099點全清的話，則指數最低都要上到19,100點，以開市價作為起標計，即係要再升多353點，連同U盤後嘅38點升幅，即係話個市要升734點先至食到嗰495張期指街貨。哈利，就算有愛但無成交同無催化劑，咁上啫？！
依家9點42分，開咗市十零分鐘後見指數已經低開高走，升幅收窄至升302點，報18,667點。比較在乎嘅係小時圖條中軸，事關今朝指數一開市就已經開到上小時圖中軸嗰位，係好尷尬，本來以為佢咁勁跳升300幾點威番次比全地球人睇下，但情況就好似貓咪跳高跳唔到而撞牆向下...陰功。
既然向下，作戰室都開出淡倉，博五分鐘圖指數見高開低走之餘，順便睇埋小時圖中軸嘅阻力有幾強，恒指熊(68293)，收回價440點，槓桿約有25倍左右，以小時圖中軸出現阻力為持貨理由，依家9點50分，五分鐘圖Slow STC(14,3)都開始見高位觸頂向下，簡單嘅用五分鐘圖Slow STC(14,3)Swing Trade一轉都可以。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
