【now.com財經】噚日數過牛熊證街貨，估計指數大幅向下嘅同時，熊證未出得切貼熊之下，出現單邊行嘅機會率會比較高。
今朝U盤都未開就睇咗個街貨圖(同作戰室戰友每日如是)。一開見到熊證新層街貨落到19,000至19,099點，但最貼價嘅呢層同恒指現價有逾500幾點距離；而牛證就精彩囉，最貼價被追落到18,400至18,499點，連同第二層嘅18,300至18,399點，已經有兩層每層各有過千張期指街貨坐喺度，貼價重鎮區，你班友博反彈啫，唔係博老命呀！ 另外，18,000至18,099點呢度亦見過千張期指街貨重貨，合理嘅，噚日都預咗啦，呢啲齊點數大關口位，有乜可能唔擺重貨？！
終於等到完U，恒指開市跌97點，報18,435點。呢個開市跌幅濕碎啦，但意義在於指數一開市已經踩返入牛證街貨層，首兩層街貨知佢咩料啦，作戰室第一注淡倉出動順街貨而行，未幾，指數將18,400至18,499點全層牛證掃清，等緊18,300至18,399點幾時掃清埋佢啫。
時間嚟到9點47分，五分鐘圖上嘅Slow STC(14,3)當然行緊超賣再超賣啦，至於小時圖方面，其實條Slow STC(14,3)由噚日到依家已經行緊超賣再超賣，不過保歷加通道口目前見仍然拓闊中，所以Slow STC(14,3)仲有條件出超賣再超賣，一旦保歷加通道頂線向下，整條保歷加通道亦同時會變成向下運行，咁指數同Slow STC(14,3)出現觸底嘅機會就會增加返，現法就要變成出動Swing Trade啦。
喺咁多牛證街貨等收回嘅預期下行市之中出好倉博行Swing絕對係冒險行為，作戰室淡倉一早開定等跌，而呢度亦都應該選擇順勢而行，吼得到指數喺五分鐘圖上中軸或保歷加頂線唔過，甚至係Slow STC(14,3)出觸頂向下時出(68293)，收回價19,188點，同現價有逾770點距離，我都唔想架，鬼叫貼熊依家最近嗰隻同現價爭670點有多，而揀隻低街貨、高槓桿嘅，都要退到去第五隻。
下半場加映隻港交所(00388)淡倉，作戰室早兩日前已經開咗，星期二(7月4日)喺YT節目中亦推介過，有無貨都好，下半Part講呢隻。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
