【Now財經台】截至早上11時止，1小時內《彭博》用戶搜尋量最多港股，依次為中國恒大(03333)、港交所(00388)、龍湖集團(00960)、長城汽車(02333)及長實集團(01113)。
內房顯著反彈，龍湖最多彈近6%上試10元，上日(24日)公布首季財務表現嘅中國海外發展(00688)亦見最少1個月高位至12.9元。3年前率先下調恒大評級至「沽售」嘅瑞銀中國房地產研究主管林鎮鴻，最新接受訪問時就轉為睇好內地樓市，指房地產市場將逐步復甦，參考價值大唔大？
紅蟻資本投資總監李澤銘指，有參考價值，但市場焦點開始轉移，依家問題唔再係新房。喺房地產連續違約下，新房供應逐步下降，同時需求亦下跌。新房銷售佔房地產嘅比例下跌，市場較關注二手房價格有冇機會復甦，係影響内地財富效應嘅一大因素。
佢又話，就算恒大賣曬現有庫存，或資產全部套現，都抵消唔到之前借嘅債。因此，二手房價格有冇機會回穩，係内地居民對房地產嘅信心及消費預期變化嘅關鍵因素。
