【now.com財經】噚日將隻過夜熊袋袋平安之後，就無再理到個市咁滯，事關都唔到我去理，橫行情況持續至完場，明明個市係開緊都唔努力啲游兩下，同呃飯食都無乜分別。
嚟到6月最後一個交易日，今朝恒指低開52點，開市報18,881點，呢口價將指數再次推近牛證街貨層，因為第一層已經係18,800至18,899點，呢度有相當於260張期指街貨，而本身為重貨區嘅18,700至18799點，今日見裡面已經有相當於1,000張期指街貨走咗佬，而18,500至18,599點嗰984張期指升咁上神檯做重貨區。至於熊證方面，第一層19,200至19,299點雖然同指數靠近返，但喺「市底弱，反彈只係開Put嘅入口位」之下，呢層已經變成最多新增+重貨區。
依家9點46分，恒指由跌轉升再升轉跌都唔知轉咗幾多次就知今日係要鬥耐性(大獲！由細到大最缺嘅就係耐性！)
再等到依家9點58分，喺五分鐘圖上似見到指數有一個似樣啲嘅方向，作戰室等咗好耐見至出到第一離好倉，不過過一陣之後阿市又再見軟皮蛇，咁樣嘅市怪不得全地球都瘋狂Put隻港交所(00388)。
日線圖上見，港交所股價於300元邊皮生咗個「小圓頂」出嚟，頸線位放喺大約296元位置，五條平均線更係一早就無晒啦，10天線同現價仲有少少距離，落到嚟而做多次阻力的話，去返5月31日嘅低位282.2元都唔出奇；只係目前日線圖見保歷加通道口收窄中，暫時限制住股價下行空間。
唔計今日，港股已經連續七日成交額低於千億，有心有力但無水都真係搞唔掂，萬一保歷加通道口唔再收窄，打平甚至重新拓闊的話，Slow STC(14,3)則有機條件出到超賣再超賣，咁就更加引人沽佢。
但係，做Day Trade嘅可以睇返簡單啲。如常用的返五分鐘圖Slow STC(14,3)吼超買位出注港交熊(67806)，收回價318元，同現價有逾6.7%距離，夠安全架啦，槓桿有約14.18倍都夠做Day Trade，簡單啲Slow STC(14,3)由超買Swing落到超賣完成一趟可以收工，鬼叫今日星期五，過夜要過Weekend咩。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
