【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、碧桂園(02007)、比亞迪股份(01211)、美團(03690)及友邦保險(01299)。
今日有消息指，騰訊跟天機控股(01520)簽合作協議，授權天機做跨行業業務發展戰略協議，此外，騰訊下星期有2件「大事件」，包括年度遊戲發布會及出首季業績，不過，股價一啲都唔興奮，「股王」業績焦點應該放喺邊？
富途證券交易部高級分析師陸秉鈞指，騰訊業績不嬲都穩陣，相信今次都唔會令市場錯愕，或超出預期好多，業績應不過不失。不過，佢認為，騰訊依家有少少被市場遺忘咗，因為市場正聚焦「中特估」股份，資金基本上湧晒去呢類股份。
佢又話，騰訊技術重要支持位喺300元水平，估計後市以橫行居多，睇吓第1季業績有冇驚喜，依家要等市場資金回流，先再有炒作空間。
