【Now財經台】獲滙豐證券唱好嘅重型機械股濰柴動力(02338)，股價今朝輕微高開不足1%後，升勢持續，午後升幅進一步擴大，一度升近10%，高見13.48元，A股更漲停板，成交股數較過去100日同時段平均增近2倍。
滙證唱好濰柴主要同公司基本因素有關，包括重型機械出口表現強勁、內地市場需求復甦等，而集團盈利能力改善亦係滙證睇好嘅原因之一，濰柴毛利率一向穩定，加上有國企背景，考慮埋國企估值修復因素，會額外加分。
其實滙證已3度上調濰柴目標價，由7.4元起步，上調至最新14元，其實已貼近現價，意味水位已經唔多。不過，今日一升，成功突破過去逾1年多次未能衝破嘅阻力，即13元水平，14天RSI剛進入超買水平，如果未來幾日企穩後再略為整固，大行可能再上調目標價，下一站或睇14.5元，之後進一步上試16元。
