【Now財經台】Tesla概念股力勁科技(00558)截至9月底止中期，收入按年微升3%至逾28億元，創半年度收入新高，但純利跌16%，毛利率亦跌1.5個百分點，力勁指，主要受原材料價格上漲、注塑機設備使用率未充分用盡影響，強調公司手頭定單充足，並正積極擴大部署東南亞、歐美等海外市場。
不過，英皇證券研究部總監陳錦興指，雖然力勁收入創新高，但睇返財務數據，發現集團經營開支控制得麻麻，加上新能源車板塊下半年轉弱，明年增長有可能繼續放慢，認為集團整體盈利有持續下滑風險。
佢續指，依家力勁市盈率(PE)約17倍，對比近期嘅盈利表現，市場可能覺得估值過高而出現調整。
力勁今日成交額係4個月以嚟單日新高，Stanley話，力勁面對好大嘅主動沽壓，好大機會失守上月低位6.83元。
