【Now財經台】力勁科技(00558)股價今日急瀉，一度重挫19%，低見6.96元，集團噚晚出咗全年業績，雖然收入增長10%，但少賺近15%，股價今日大跌係咪同呢份成績表有關？
艾德金融董事陳政深認為，力勁股價急挫主要同公司盈利能力、成本控制有關，集團主業係生產造車機械，但行業高速增長期已過，估計未來只會穩步增長。支出方面，主要用於人力資源，但Ryan認為，其實力勁嘅業務毋須用咁多人力，加上有高度自動化生產，但力勁人力成本大幅增加，但收入就未見明顯提升，反映公司成本控制唔理想，加上市場對新能源汽車前景存疑，以及利率高企等不利因素，都會進一步壓低力勁股價。
Ryan話，力勁另一個隱憂財務成本愈來愈高，對孭重債嘅企業十分不利，公司貸款較去年大升逾50%，負債比率升13.1個百分點，如果冇現金流入，財務狀況令人憂慮。
