【Now財經台】港股10連升後回調之際，工業股力勁科技(00558)強勢跑出，股價今日(7日)午後愈升愈有，最多大升16%至3.88元，衝上3個半月高位。
力勁4月中曾被美銀唱淡，主要是集團壓鑄機收入或受累車廠和汽車零件廠嘅資本開支(CAPEX)收縮，並大削股份目標價至2.9元。不過，力勁股價相當爭氣，自4月中由低位反覆向上，至今已累升逾30%，今日更重上100天線，係咪代表之前跌幅已經反映完利淡因素？
信達國際研究部董事趙晞文認為，力勁呢輪升勢未必關基本面事，並估計資金見到同業海天國際(01882)股價飆升而追落後。佢分析指，海天主要生產低噸位注塑機，唔少客戶來自消費電子及飲食製造業(F&B)等下游產業，而海天嘅預測市盈率(PE)約14倍，股價年初至今由15元水平翻倍至近28元，同樣有注塑機業務嘅力勁則有10倍PE，因此估計力勁股價尚有10%至20%水位。
不過，趙晞文提醒，公司旗下「世界最大車身壓鑄機」Giga Press嘅訂單及市佔率未來有被攤薄風險，並會限制力勁嘅估值修復空間，因為…
