【Now財經台】山東新華製藥(00719)A股尾市倒跌，4連升斷纜外，更拖累H股，H股今朝高開2%後，最多升逾4%，但好快就倒跌，尾市跌幅一度擴大至8%，低見4.48元，收市報4.55元，跌逾6%。
集團從事開發、製造及銷售化學原料藥製劑、化工及其他產品，公司最新消息係，今個星期初同健康消費品公司拜耳簽署戰略合作協議，啟動在商務分銷領域嘅電商合作，可能市場憧憬今次合作有助公司開拓市場，消息公布後，股價一度急升16%，不過，協議冇提及合作細節，可能令市場冇咩信心，導致股價升勢無以為繼。
山東新華製藥股價前日一舉升穿100天及250天線，之後公司出通告澄清，話不明股價波動原因後，今日就失守100天及250天線，亦係中長線嘅技術關口。後市要小心短線沽壓未完，有機會落到前日急升前嘅起步位，即4.3元水平。
