【Now財經台】內地正處於支原體肺炎感染高峰期，主要症狀係發燒、咳嗽，號稱全國內最大解熱鎮痛類藥廠嘅山東新華製藥(00719)，受消息刺激喺A股升停板，H股則最多升12%，高見6.36元。
其實去年底當內地開始居家防疫，市民熱搶解熱鎮痛藥布洛芬時，集團股價就曾經喺7個交易日內被炒上3倍，創17元嘅歷史高位。
今日借消息爆升嘅劇本重演，博威環球證券金融首席分析師聶振邦指出，恒生指數喺10月5日展開6連升起，山東新華股價先有起色，技術上股份自5月29日起一直受制於6.5元水平，認為短期內將遇阻力，現水平追入未必有好多水位，建議投資者先行沽貨獲利。
不過，山東新華作為國企，做原料藥等業務穩健，聶Sir亦指，集團中長線投資價值更高，市盈率(PE)一向低於10倍，可以等股價回落至5.5元以下考慮入市，屆時股息率更吸引，有近4.5厘。
