【now.com財經】今朝揀咗隻恒指熊(55915)出嚟，仲諗住比啲時間等指數稍回返上保歷加通道中軸見阻力，或者Slow STC(14,3)上返去超買水平先至落場。不過，今日上半場，除咗開市之後首20分鐘有見過指數頂住中軸之外，都再無見過指數靠近過中軸位；而Slow STC(14,3)更加連中軸都上唔到，莫講話超買水平；還好作戰室注淡倉成功落場。
依家1點8分，下半場開市之後指數跌幅再加深，依家見跌413點，報15,014點，再次考驗15,000點，而今朝見嘅四層新增牛證街貨層已經全數死亡，夾埋有相當於319張期指，或者對個市嚟講，只係小菜一碟，根本唔夠飽。
再過多3分鐘，指數再次失守15,000點，換言之被收回嘅街貨增加至498張期指，恒指再次重返牛證重貨區14,900至14,999點，呢度有相當於1,070張期指嘅街貨，會唔會用餘下呢兩個零鐘食埋佢？都真係唔係無可能。
如今朝所見恒指無論日線。週線定月線都見到Slow STC(14,3)處於超賣至嚴重超賣範圍，但問題在於保歷加通道底線係完全無上行嘅反應，連打橫行嘅情況都唔見，明白到指數跌到依家呢個位，按恒指服務公司見9月恒指PE仲有9倍幾時，到依家10月恒指PE落到8倍幾嘅可能性非常高，亦即係話恒指嘅PE已經跌到落去一個歷史低位附近，當然唔係話去到呢個位就一定會停，但相對地恒指大割引嘅幅度愈來愈深，假如(係假如)市場仍然對港股抱有希望/有興趣的話，按常理(係常理)資金會買始分階段買入佢哋認為係抵價同值得去買嘅個股，開始進行低位儲貨嘅環節。
仍然未敢睇好大市，不過去到呢啲位，騰訊(00700)200蚊長城我估會稍稍地築起來；會唔會落返去拆細後初價105蚊？嘿，都真係唔知，只係希望IFC條龍唔好咁多人就得啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
