【Now財經台】東方航空(00670)今朝高開逾1.4%後，升幅一度擴大逾5.5%，高見2.85元，成交股數較過去100日同時段平均增1倍。
東航噚日喺官方微博宣布，將會喺10月20日恢復多條國際航線，由現時每周25條54班增至每周42條108班。此外，中國南方航空(01055)亦指，會增加及恢復部分航線。雖然「二十大」報告堅持動態清零，但其實早喺8月已經恢復國際航線，今次東航增加航線，令市場憧憬內地「7+3」可能微調、放鬆嘅可能。
3大內航股今朝造好，其中東航一口氣升穿10天、20天、50天及100天線，但去到250天線，即2.8元就止步，值得留意係，雖然公司有正面消息，但航空公司要真係復甦及恢復盈利，仍需要一段時間。
