【Now財經台】主營運油業務嘅中遠海能(01138)今朝顯著下跌,低開逾2%後,跌幅一度擴大至逾8%,曾低見6.02元。
OPEC+宣布下月起每日減產200萬桶原油,不過,由於有啲國家產量未達配額,每日實際減產應該只有100萬桶。此外,歐盟今日起對俄羅斯實施新一輪制裁,會對俄羅斯出口石油設價格上限,市場普遍認為,呢2項措施或令運油量減少及影響運價。
中遠海能72%收入來自成品油運輸業務,如果運油價量齊跌,將不利公司業績。至於反映海運原油運費嘅VLCC指數亦顯示,近日多條航線運價由高位回落,亦加大中遠海能股價壓力。
中遠海能今日失守50天線,意味中線走勢轉差,若確認上唔返50天線,就要下望100天線,即5.6元嘅支持位。