【now.com財經】今朝揀咗隻恒指熊(65668)，都Set好咗兩款落場位，進取嘅可以等指數確認失中軸就進場；安全嘅梗係等埋Slow STC(14,3)兩線上返去超買水平。睇返整個上半場，恒指喺五分鐘圖上中軸係無失過，而Slow STC(14,3)則有兩次入到超買範圍，一次喺11點10分左右，第二次就係臨上半場尾市時段，不過，睇返成個恒指走勢。根本就係踩住50分鐘線(五分鐘圖10線)，再乘保歷加通道整條上行而上，連50分鐘線都失唔返落去，連自己都喺作戰室見指數踩住保歷加通道中軸而出好倉，呢注淡倉點出呢。
中午時港交所(00388)公布業績，半年純利錄得48.36億元，按年倒退26.8%，遜預期。等緊下半場開市時，舊同事又約食飯，哈哈，借口多多但最終目的都係大家想見個面，開心一下咁啫。
下半場開市後見指數二話不說地向上彈高多一下，喺五分鐘圖上見到指數確認企穩750分鐘線(五分鐘圖150線)。開埋小時圖睇見指數噚日尾市出嘅「身懷六甲」湊效得幾強，唔經唔覺先將指數反方向向上打高上10小時線(小時圖10線)，午後反嚟一舉打上50小時線(小時圖50線)以上，依家頭頂雖然仲有條20小時線(小時圖20線)，可能隨時喺呢個鐘裡面都上破埋。
依家1點10分，指數暫時見高位20069點，喺呢個位置指數喺五分鐘圖上係行咗「射擊之星」出嚟，同步Slow STC(14,3)兩線上到超買水平有遇頂回落嘅情況，本來呢啲位可以出隻(65668)博一博見Swing，但係指數今日似乎真係好升得，又重上20,000點樓上靠近返熊證街貨層...
算啦，一心大心細做唔到決定，唯一一條路可以行嘅就係唔做決定。上半場入唔到，下半場食花生算啦(最怕呢頭出完文，嗰頭成注飛一出一入收得工啫)。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
