【now.com財經】今朝揀咗隻騰訊熊(63735)出嚟，Set咗如果股價喺五分鐘圖上見有上到中軸但出現遇阻，咁(63735)可以出動；安全嘅用返Slow STC(14,3)Swing Trade方法，等Slow STC(14,3)Swing返上超買水平時先至出場。
以今朝Patreon出文時間10點半計，剛好當時恒指無啦啦一棍向上，可能係受到新防疫政策，酒店檢疫改為「3+4」影響，見到騰訊(00700)都有出現「大陽燭」向上打高，不過，就正正受到中軸影響，股價上到中軸即遇阻向下運行。當用咗10分鐘時間睇今朝條文，即10點40分返去再睇返騰訊五分鐘圖，當時股價已經再次低走於50分鐘線(五分鐘圖10線)以下水平，喺呢個時侯出隻(63735)的話可以，以期內(63735)高低位做過0.042元/0.041元計，平均買入價為0.0415元。
上半場完場前，恒指於五分鐘圖上見指數上破保歷加通道中軸，重返保歷加上升通道運行，而騰訊股價雖然保持向下，但都有見保歷加通道口收窄，(63735)中午收市報0.043元，即平均得1.5格賺幅，絕對係純幫補手續費之後就收工嘅一注，或者下半場返嚟睇返50分鐘線或保歷加通道中軸有無力再次擋住個股去路。
餵完我家肥貓，打咗陣機休息一陣，下半場又開市，騰訊股價有見向上再抽高一下，一度上破保歷加通道中軸水平，如今雖然再度回落，但Slow STC(14,3)兩線尚未確認方向向下，同時保歷加通道口仍然未見拓闊。(63735)證價午後暫時0.043元。
咁樣啦，即市騰訊五分鐘圖仍然守得住處於保歷加通道中軸以下位置的話，(63735)就姑且守多陣啦，最佳想當然係保歷加通道口拓闊，中軸打返指數向下再落啦；否則更係閃人先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
