【Now財經台】英諾賽科(02577)股價今日(22日)高開逾13%後，升幅一度擴大至近20%，高見41元，其後升幅收窄，成交股數較過去100日同時段大增23倍。
英諾賽科係致力研發第3代半導體硅基「氮化鎵」及產業化嘅公司，據公司網頁顯示，集團有全球最大8英吋硅基氮化鎵晶圓產能，產品設計同性能皆達到國際先進水平，簡單嚟講就係炒作「氮化鎵」、英偉達(Nvidia)概念，但暫時見唔到對公司有好大幫助。
英諾賽科今日喺大成交下抽升，股價已升至保歷加通道頂，喺資金炒股唔炒市下，可能有動力再衝高啲，但過去1個月一直受制40元關口，如果短線企得穩，下一站可以睇42元，即50天線。此外，要留意公司下月底就上市滿半年，前期投資者嘅股份解禁，或為股價帶嚟壓力。
