【財經TOP SEARCH】政府介入萬科仍有機會違約

【Now財經台】截至早上11時止，1小時內《彭博》用戶搜尋量最多港股，依次為萬科企業(02202)、金山軟件(03888)、萬洲國際(00288)、騰訊控股(00700)及小米集團(01810)。

萬科發盈警，預告2024年轉蝕，摩根士丹利指，集團核心虧損遠低過市場預期，焦點落在萬科宣布管理層出現重大變動，早前傳出被公安帶走嘅總裁兼首席執行官祝九勝辭職，原任主席郁亮亦辭去職務，但留任董事及執行副總裁，主席一職會由國企大股東深鐵集團嘅辛傑接任，深圳市國資委又指，有足夠「子彈」支持萬科穩健發展，係咪代表萬科2025年到期嘅330億人仔債券唔使違約？不過，摩根大通形容，內地政府只會量力而為，唔會全力以赴，大摩對萬科睇法亦繼續審慎，擔心集團土儲有限，加上負現金流限制集團未來兩年買地，長遠會令房屋銷售萎縮。

富途證券首席分析師譚智樂指，政府介入嘅目的係以保交樓為主，並唔代表唔會違約，違約係指公司唔能夠如期還債等，而內房政策唔能夠保證公司唔違約，建議投資者係投資內房前仍然要審慎。

Arnold又話，目前市場對債務市場有顧慮，相信只要唔出現大型倒閉，市場已經收貨，內房暫時都未有條件考慮增長，要先以保交樓以及防止大規模違約為目標。