【專家分析】渣打成績表收唔收貨？

【Now財經台】渣打集團(02888)今日(24日)中午出咗業績後，股價午後坐過山車，一度急挫2.6%，低見187元，之後又拗腰倒升，曾高見201.8元，升逾5%，睇返呢份成績表，算唔算係好壞參半，市場又收唔收貨？

天風國際李偉傑表示，如果集中睇去年第4季業績，其實整體表現符合預期，雖然理財業務收入少過預期，加上去年第4季資產價格變化冇去年首3季咁理想，但市場之前普遍擔心嘅淨息差收窄問題，反而未喺去年第4季出現，主要係雖然美國有減息，但香港嘅最優惠利率(P)冇跟減，某程度上抵銷咗理財業務收入減慢嘅影響。

整體業績方面，Jason認為，渣打呢份成績表合格有餘，不論利潤增長及派息都好理想，雖然按個別季度變化嚟睇，或會令市場出現按季表現嘅震盪，但呢個其實係配合環球股市嘅形態格局去走。