【專家分析】古茗有貨新年前要食糊

【Now財經台】農曆新年好快就到，阿里巴巴(09988)旗下千問App「春節30億大免單」活動今日(6日)正式上線，首輪活動送奶茶，包括內地各大主要茶飲品牌，古茗(01364)、奈雪的茶(2150)等，千問App短短3個鐘內落單量已逾100萬，農曆新年快到，加上有平台活動助攻，茶飲股今轉可唔可以炒耐啲？

王道資本及家族資產管理執行董事黃敏碩認為未必，始終呢個係新消息，長遠要睇定位、營運數字及今年整體發展，今日消息公布後，只有古茗破頂，其他茶飲股都冇跟升，甚至冇乜反應。

Michael指，古茗今年會再開3300間門店，會擴展至一線城市，集團營運有改善，消費者對產品有信心，同埋店舖增加，喺呢個乘數效應下，市場對古茗反應會較正面，加上有節日氣氛推動，就炒起股價。Michael建議投資者春節前食糊，因為到時節日效應已到水尾。