【專家分析】老鋪黃金股價同金價「拍住上」？

【Now財經台】老鋪黃金(06181)喺2025年3度加價，但似乎無損消費者購買意欲，大行亦繼續睇好集團，指剛過去嘅元旦需求復甦，預期農曆新年銷售會更強勁。不過，若公司短期內再加價，市場會唔會唔受落？

元宇證券投資總監林嘉麒表示，如果老鋪黃金短期內再加價，可能對超短線投資氣氛構成一定負面影響。佢解釋，一旦再加價，可能令投資者擔心2025年國家調控金價嘅事件會重演，當時相關政策曾導致黃金及珠寶股顯著回調，但佢指出，金價回復力好強，好多時好快就升返上去。

KK續指，老鋪黃金有別於其他同業，隻團主打古法黃金，毛利率較高外，產品認受性亦較高，因此，就算面對金價上升，集團都有足夠能力將加幅轉嫁畀消費者，以保障公司利潤。佢又認為，若金價今年維持升勢，唔排除老鋪黃金會持續加價，但相信唔會打擊公司銷售，並預期老鋪黃金股價有望跟隨金價向上。