【Now財經台】今個星期派咗成績表嘅焦點重磅科網股,表現普遍未如理想,放榜後股價都要受壓,值得留意係,阿里巴巴(09988)上季收入及經調整盈利都差過預期,但股價今日一度逆市升4.5%,收市仍升3.4%,報83.35元,點解阿里股價唔使跌?
亨達財富管理董事總經理姚浩然指,阿里份業績表現突出嘅環節唔算多,放榜後冇進一步下跌,仲反而有得升,只係之前跌得多,其實「燒錢」情況仍持續,電商業務對盈利貢獻多咗,主要係內地即時零售業務虧損大幅收窄,營業額增速亦慢咗,所以業務表現唔算太強。
Patrick又話,阿里之前集資約800億元,截至9月底止,手頭現金約2200億人仔,之前燒咗約300億人仔,就算未來1年再要燒500億人仔,起碼仍有錢可燒,呢一方面係比其他科企好。
