【Now財經台】本港證券無紙化今個星期正式實施,本港上市公司將會喺未來5年分批轉為無紙化,其中,港交所(00388)將會成為首批「無紙股」之一,首批名單有咩篩選條件?處理龐大實物股票過戶又面臨咩挑戰?
中央證券企業服務總監伍蓓欣指,明年第1季將會有約5家上市公司率先進入無紙證券市場,雖然初期數目較少,但隨著認識加深,參與比例將逐步提升,雖然上市公司意願係考量之一,但唔係單一因素,過戶處、聯交所、中央結算3方會緊密溝通,綜合評估公司規模、股東數目、現行流通股票數量,以及企業近期係咪有行動等條件,才去設立5年過渡時間表,所以首批名單會由不同類型公司組合而成。
Ivy又話,無紙化喺香港已經醞釀咗一段時間,公司過去幾年已投入大量人力物力去籌備,以及加強內部培訓,亦已引入預約系統,公司可以預估查詢人流,幾個月前亦推出咗應用程式及網頁,讓股東提前熟悉網上管理股份,所以預期唔會出現太大問題。