【Now財經台】渣打集團(02888)今日(28日)中午交咗一份靚季績，刺激股價午後飆升，一度高見222元，勁升8.7%。集團第3季稅前多賺27%，超預期，非利息收入按年升19%，主要受財管業務及環球市場強勁增長帶動，成為盈利「雙引擎」推動。反觀昨日(27日)出季績嘅滙豐控股(00005)，財管業務收入按季微跌，點睇呢兩份成績表？
元宇證券投資總監林嘉麒表示，分別在於兩家銀行定位唔同，渣打主打新興市場，主要以高增長客戶、大型機構投資者為主，加上渣打嘅投資產品回報，會因應新興市場波動會產生溢價，所以非利息收入可能會高啲。
KK又話，面對地緣政治因素影響，渣打反而更受惠，渣打主打全球互通策略，相關嘅客戶關係經理會跟隨客人周圍走，因應地緣政治局勢轉去其他地方，幫客戶重新進行財富管理，變相做多咗生意，反而滙控每個地區都有特定客戶關係經理，靈活性冇咁高，呢個亦係過去幾季渣打都跑贏滙控嘅關鍵。
