【Now財經台】海通恆信(01905)今日(26日)復牌股價爆升，一度狂飆近41%，高見1.69元，集團獲上海國資委旗下上海國際收購內資股外，並以每股2.16元向H股股東提購，較停牌前有80%溢價，不過，海通恆信今日即市高位同要約價仲差好遠，如果冇貨現在入場，仲有冇水位？值得留意係，交易完成後，海通恆信H股公眾持股量會被攤薄至僅逾10%，而現時港交所(00388)規定唔可以低過15%。
《香港股票財技密碼》作者梁杰文認為，若全部H股股東接受要約，H股公眾持股量會跌到唔夠11%，就算攞晒豁免都滿足唔到港交所要求，所以應該會有嘢跟尾，例如諗辦法提高返公眾持股量，如果乜都唔做會有除牌風險。
Mike又認為，現價買海通恆信仍有水位，但就好難升穿要約價。
