【Now財經台】港交所(00388)股價今朝(14日)一度跌2.2%，低見371.2元，跌至3個月低位，除咗受大市氣氛及成交疲弱影響，亦因為市場擔心IPO生意，會受證監會日前搗破兩個IPO造假集團，凍結近47億元資產，事件涉及茶百道(02555)等3家上市公司，呢場「打假風暴」會點發展，對本港新市場有咩影響？
元宇證券投資總監林嘉麒認為，投資者短期毋須過度恐慌，亦唔會令所有新上市股份都會停牌，香港IPO集資排名全球第1，依家有大量人工智能(AI)排隊在港上市，如果失去呢批資金，有機會影響未來新股上市數目，繼而影響港交所上市費、交易費收入，以及各類牌照中介機構生意額，牽連範疇可能比較廣，而市場上所謂嘅「陋習」，或令監管機構收緊上市審查條例，日後要搵合規投資者會唔會更難，相信對整個IPO市場影響都幾深遠。
KK坦言，今次應該唔係單一事件，新股市場背後嘅遊戲規則其實大同小異，只不過係睇有幾多證據，如果相關秘密協議被曝光，唔排除有更多關聯公司及投資者被牽涉在內。
