【突落場打Pokemon卡牌戰】龍豐連升幾日要回氣 呢浸炒完？

【Now財經台】港產連鎖藥房龍豐集團(02290)近期踩過界，賣埋日版「Pokemon(寶可夢)30周年原裝紀念卡盒M6a」，以「價錢更平、攞貨更快」做賣點，一盒日版M6a售價殺落828元，同鍾培生旗下HKTCG早前售價1800元比較，平一半有多，市場似乎亦睇好公司「奇蹟轉型」，做埋呢盤生意，刺激股價連日上升，雖然今朝(18日)逆市跌，但5個交易日計，仍累升逾15%。

龍豐股價今日輕微低開後，一度挫4.4%，低見4.245元，股價最新續於低位上落。