【Now財經台】濰柴動力(02338)股價今日(17日)大幅高開10%，其後升幅一度輕微擴大，高見32.54元，濰柴合作供應商Generac(GNRC)近日同亞馬遜(Amazon)簽咗大定單，其實濰柴同Generac早喺去年4月已經有合作，當時2隻股份走勢相若，但Generac股價近月顯著回落，濰柴就冇乜點跌，濰柴係咪可以複製今年2月中，上調指引時升勢？
元宇證券證監會持牌人士李偉傑指，今年6月30日前，人工智能(AI)相關業務受惠於AI熱造好，但7月2日後，相關板塊全面被洗倉，依家AI算力硬件股整固緊，所以未有明確方向。
Jason續指，雖然濰柴有機會因為合作公司造好而跟隨，但中長線而言，仍要視乎亞洲區喺AI算力公司嘅資金投放程度，暫時睇嚟濰柴股價未必可以上返2月時水平，即使合作伙伴Generac攞到Amazon大定單，對濰柴嚟講係正面，但未必會咁快喺股價反映。
