【Now財經台】嗶哩嗶哩(B站)(9626)股價今年暫時累跌逾37%，更創咗今年新低，騰訊控股(00700)上周五(4日)收市後宣布，沽出4億股B站股份，但認購約2億美元，B站計劃發行嘅可換股債(CB)，呢個舉動為投資者帶來咩啓示？
《香港股票財技密碼》作者梁杰文認為，呢個屬於利淡消息，B站股價由逾200元跌至現水平，即120元水平，已經跌過龍，好多股東都預期股價會出現反彈，但其中1名大股東喺低位清倉，認購部分5年期、2031年到期嘅CB，不過，就算騰訊咩都唔做，減持後揸返CB都會全數拎返現金。
Mike又指，今次減持同以往騰訊減持美團(03690)、京東集團(09618)性質一樣，都係剝離非核心業務，因此，參考美團及京東遭騰訊減持後嘅股價表現，B站股價應該冇咁易反彈。
