【Now財經台】港股今個星期連跌4日後，今日(4日)顯著反彈，更一口氣收復晒之前4日嘅失地，值得留意係，市況較差時，北水連續7個交易日流入，但今日一彈，北水今朝又轉為流出。此外，摩根士丹利最新唱淡港股及A股，其中，下調恒生指數目標逾6%至26550點。點睇現時港股市況？
冠域商業及經濟研究中心主任關焯照指，港股係一個窄幅波動格局，恒指一掂到25000點就會彈返上去，今日彈上20天線，走勢都算唔錯，但由於北水流走，港股好難再大彈，不過，由於美元弱有利亞洲股市，個別股份就會郁，例如滙豐控股(00005)及渣打集團(02888)就郁得特別勁，整體金融股表現都幾好，而內銀及內險股呢幾日都有得升，都有利港股走勢。
關博士續指，如果恒指要突破26000點，就要外圍造好配合，同埋資金喺亞洲區回得好快，因為美元弱對亞股有好大幫助，就算北水流走都有助恒指升上26000點。佢又話，唔太同意大行削恒指目標，因為港股喺第4季或會有驚喜。
