【Now財經台】截至早上11時止，1小時內《彭博》搜尋量最多港股，依次為中國平安(02318)、比亞迪股份(01211)、友邦保險(01299)、聯想集團(00992)及梅卡曼機器人(09615)。
保險股，尤其內險股今日(3日)升得靚，其中，平保一度升4%，高見57.7元，集團8月20公布業績後，股價已升咗唔少，係咪因為保險股防守力強？點解投資者會偏好平保？
香港股票分析師協會副主席曾永堅指，保險股有一定防守力，派咗成績表嘅內險股表現都好好，反映保險產品需求有增無減，加上股權投資方面比重較大，唔少高投資收益回報嘅內險股，都成為資金追捧對象。
Jasper又話，平保估值相對盈利前景都較吸引，股息率亦唔錯，有近6厘，喺現時嘅環境下可睇高一線，並預期會有機構、資金增持或加倉做中長線部署，估計短期資金追入力度持續，支持平保股價可反覆突破58元關口。
