【Now財經台】蜜雪集團(02097)今日(27日)中午出咗業績，中期收入按年增長2%，純利就按年跌14%，午後股價大插水，一度急瀉逾12%，低見217.6元，近日好多內需、消費股業績麻麻，蜜雪呢份中期績表真係令市場咁失望？
艾德金融執行董事陳政深指，蜜雪呢份業績有兩個失望位，首先公司賣點係「極致性價比」，但產品始終係非必需品，唔會話唔飲唔得，所以當消費者手緊時，自然會減少呢類消費，反映內地底層消費力仍然疲弱，單靠平唔係一個「免死金牌」。
其次係蜜雪本質係一家批發商，有98%收入來自賣食材及設備畀加盟商，原本呢個商業模式都賺錢，但當加盟商搵唔到食，批發商自然都搵唔到錢。
Ryan又話，對投資者嚟講，買一隻股票都希望穩定收息，唔係純粹收一次性嘅特別息，對食息族嚟講冇太大吸引力，股價今日跌咗落嚟，關鍵在於投資者點睇未來嘅零售、內需市場。
