【Now財經台】港股嘅茶飲股過去一段時間跌咗唔少，所以估值都平咗好多，之前外賣平台大戰利好茶飲股，點評估今年業績？古茗(01364)及蜜雪集團(02097)最新被摩根大通削盈利預測，但繼續叫增持古茗，係咪意味摩通仍然睇好？
元宇證券大中華區股票投資總監趙晞文指，中長線去睇，呢啲茶飲公司上市初期擴張步伐較快，衍生咗一啲問題，導致單店規模效益、營運效益、盈利能力曾面對挑戰，過去大半年，呢啲茶飲公司都作出戰略調整，例如放慢開店步伐，調整店舖結構，希望提升店舖效應。
佢續指，幾間茶飲龍頭，預期今、明兩年收入及盈利增長約20%，估值亦冇乜問題，不過，茶百道(02553)相對差啲，呢個同公司自身營運問題有關，佢認為，滬上阿姨(02589)、蜜雪及古茗短炒有得諗，如果想做中長線部署，分階段持有會較穩妥。
