【Now財經台】據內媒報道，內地稅務部門已向境外保單徵個人所得稅，香港保單收益包括股息及預繳保費產生嘅利息徵稅20%，消息一出，昨晚(5日)即時震散保誠(02378)、滙豐控股(00005)及渣打集團(02888)倫敦股價，點睇呢個政策嘅影響？
鴻鵠資產管理行政總裁陸庭龍指，呢個稅率唔係特別高，因為睇返內地稅率平均介乎20%至30%，不過，雖然徵稅後保險公司可以繼續做生意，但關鍵係未來呢啲保單要吸引內地投資者，首先，要壓縮保險公司盈利規模，去提升返回報，抵銷呢20%稅率，先可以令保單較吸引，其次係，如果向海外保單徵稅作為一個標準，未來有可能擴至其他海外投資戶口，例如物業及金融投資。
Alan又話，如果將呢個動作單獨或全盤去睇，都見到內地對資金投資海外嘅規管愈收愈緊，對香港作為境外金融或財富管理中心，未來資金流動速度會慢咗，而計算成本及回報都同依家好唔同。
