【Now財經台】滙豐控股(00005)今日(4日)中午出咗第2季及中期業績，股價午後走勢波動，升過又跌過，一度高見169.7元嘅除淨後新高，升近1%，但之後跌至164元，跌2.4%。睇返上季業績，基本所有大數都好過預期，不論列帳稅前利潤，還是經調整稅前利潤，表現都好過市場、大行預期，似乎中東衝突冇對滙控業績有重大影響？
天風國際李偉傑表示，滙控放榜後股價劇烈震盪都係合理，因為睇返之前2、3季，出業績當日股價都喺高位有震盪。業績方面，除咗有形股本回報及計劃回購規模低過預期，其他大數都好過預期，所以呢份業績係冇問題。
Jason又話，雖然第2季開始中東戰事升級，但滙控業務冇受影響之餘，市場反而對財富管理嘅需求更大，因為投資者要做資產配置，就要靠呢類大型國際性銀行，所以之前渣打集團(02888)業績都做得好，睇返今次嘅業績，滙控財富管理業務增長驚人，喺環球局勢唔穩定之下，銀行嘅財富管理業務反而可以突圍而出。
