【Now財經台】渣打集團(02888)今日(29日)中午派咗中期成績表，第2季稅前溢利按年增長2%至23.34億美元，淨利息收入升6%至逾28億美元，都好過市場預期，中期息大增66%，又宣布加碼回購股份，刺激股價午後拗腰倒升，一度大升6%，高見237元，點睇呢份業績？
元宇證券投資總監林嘉麒指，渣打利潤唔算增長好多，而市場之前對中期息期望唔高，但今次大增66%，出手非常闊綽，為市場帶嚟驚喜，集團核心業務有改善，雖然股價依家企喺高位，但未來仍要做啲嘢去維持投資者信心。
KK又話，渣打股價有啲尷尬，午市早段升得多，但歐洲交易時段開始升幅就收窄，不過，以渣打喺新興市場嘅定位嚟睇，估值仍有上升空間，但短期投資者有機會選擇獲利，繼而令股價出現波動，依家落返230元水平，反而係中長線買入機會。
