【Now財經台】攜程集團(09961)今年1月因涉及壟斷行為，被市監總局立案調查，經調查後，認定攜程存在2項壟斷行為，被行政處罰52億人仔，不過，攜程股價今日(27日)不跌反升，一度大升近8%，高見369元，其後升幅收窄，臨近尾市仍升近4%，點解收咁大張罰單，股價仲可以大升？
高歌證券金融首席分析師聶振邦指，因為市監總局早喺1月中已公布調查攜程，當時股價裂口大跌，自高位613元「腰斬」，其後呢輪跌勢持續約半年，直至臨近7月，股價先開始自低位300元水平慢慢回升，由於消息都持續咗幾月，相信市場都消化晒相關負面消息，因此，聶Sir認為，處罰事件嘅影響已反映晒。
