【now.com財經】英偉達(Nvidia)供應商之一，內地光模組龍頭中際旭創(03308)公開招股，將會喺下周一(27日)截飛，一手要5萬蚊，有機會成為史上最貴新股，雖然中際旭創係一隻明星新股，但新股喺過去一段時間，不論首掛及上市後表現都麻麻，加上港股近期市況波動，入場費咁貴，抽唔抽都令唔少散戶要「停一停 諗一諗」。
此外，中際旭創係「A+H」新股，如果用A股昨日收市價計，同H股招股價上限有約18%折讓，吸引力唔算好大，更重要係，睇返近期已上市嘅「A+H」新股，有幾隻仍要「潛水」，例如普源精電(00537)、立訊精密(02475)及鼎泰高科(01377)，暫時仍較招股價低逾6%至逾30%，想「最後衝刺」認購中際旭創嘅散戶，可能又多咗一重考慮。
