【Now財經台】永康控股(02523)周三(8日)截飛後，突然宣布煞停上市，相信港股市況好大機會係其中一個因素。不過，港股近日市況其實唔差，恒生指數已自低位反彈咗唔少，新股市場方面，今個星期有15隻股份上市，雖然有5隻首日「潛水」，但亦有7隻高收，點睇新股市場依家嘅情況？
高歌證券金融首席分析師聶振邦指，近期上市新股表現，明顯同5月、6月有好多係倍倍聲咁升，近期接連出現「潛水」情況，而且唔止1、2隻，例如普源精電(00537)首掛低收37%，同仁堂醫養(02667)首日亦大插39%。佢又話，由於要趕上財政年度嘅半年結，所以好多新股都喺6月底時進行IPO，導致單日有超過5隻新股齊齊上市嘅情況，可能導致市場消化唔到。
聶Sir又話，估計新股表現短期仍會比較參差，暫時過咗上市聆訊嘅股份只有3隻，所以IPO市場嚟緊應該會靜啲。
