【Now財經台】港股自6月底低位反彈，恒生指數已重上24000點，累計反彈逾千點，後市再升空間有幾大？
黃國英資產管理董事黃國英估計，恒指要再彈高好多機會唔大，今轉反彈主要基於兩個因素，首先係由淡倉推動，其次係自外圍硬件股轉差後，市場就出現分散投資嘅需要，開始喺弱勢市場搵價值。
早前炒到癲嘅中資人工智能(AI)股，有幾隻已「解禁」，其中，智譜(02513)、MiniMax(稀宇科技)(00100)喺解禁即「抽水」，呢啲AI股係咪會持續強勢？有冇潛力追上美股嘅AI股？
Alex認為，部分H股科技股已經冇乜力再上，加上相對A股仍有折讓，雖然大型科技股睇落平啲，但新興中資科技股如智譜、兆易創新(03986)等，估值比外國同類股份貴，絕對體量細啲，但盈利能力差，只因國產替代及國內資金力谷，令到估值咁貴。
英Sir續指，呢啲中資AI股後市點行好難估，始終估值貴、波動性大，單日彈10%好容易，其實估值有需要下調，相比之前動力係差咗，特別智譜配完股，可以話個地基打穩咗，地板價高咗嘅同時天花板都低咗，估計短線會喺高位反覆上落，加上港股多IPO，一浪接一浪，投資者炒完一個泡沫，會再搵另一個泡沫炒，呢個時候留守喺一個泡沫就唔值博。
