【Now財經台】「國產GPU四小龍」之一嘅半新股壁仞科技(06082)上周「解禁」後，即宣布「抽水」，集團計劃配股集資最多逾70億元，配股價46.2元，較上周五(3日)折讓約10%，集資額仲多過IPO，由於行業不斷要燒錢，嚟緊仲有其他人工智能(AI)相關股解禁，呢股「AI抽水潮」會唔會愈演愈烈？
《香港股票財技密碼》作者梁杰文指，相信呢批半新股解禁後，好大機會「抽水」，呢啲股分半年前上市，但AI投資熱潮喺4至5個月前先開始爆發，意味上市時估值都偏低，股價至今已累積好誇張嘅升幅，所以禁售期一過應該會開始沽貨。
Mike又話，AI行業較易波動，加上未有穩定嘅經營模式，為咗公司長遠發展，食住呢股投資熱潮配股集資，某程度上可以話係未雨綢繆，雖然壁仞從事GPU業務都要燒錢，但相對冇咁嚴重，如果以公司現金水平同研發開支比較，都仲有好大空間，加上2025年收入只有逾10億人仔，若今次成功集資，手頭多咗幾倍資金，會對未來研發有保障。
