【Now財經台】截至早上11時止，1小時內《彭博》搜尋量最多港股，依次為比亞迪股份(01211)、小米集團(01810)、禮邦醫藥(09637)、ASMPT(00522)及美團(03690)。
車股今日(2日)普遍向上，其中，比亞迪一度勁升近10%，高見79.6元，集團6月新能源汽車交付按年增長5.5%，純電動車第2季交付55.71萬輛，據《彭博》分析，比亞迪銷量好大機會再超越Tesla，係咪因為呢個原因推高股價？
香港股票分析師協會副主席曾永堅指，比亞迪利好消息多，市場尤其關注新能源車銷售，其中，「出海」數字比到市場驚喜，反映有一定競爭力，有機會再壓倒Tesla，最重要係可以延續增長趨勢，加上發展新項目，都可以支撐股價短期持續反彈。
Jasper又話，另一個因素就要睇大市，日本及南韓股市都同美股一樣，投資者進一步減持半導體、硬件股，反而非近期當炒嘅股份就炒上，估計係資金搵落後股炒。不過，比亞迪技術上仍未擺脫自去年高位，即157元跌落嚟形成嘅長期下降通道，建議先睇85元，如果成功突破，可再上望90元。
