【Now財經台】兆易創新(03986)股價今日(18日)勁升逾11%，收報939元，創新高，主要受惠於海外大廠退出利基型DRAM(動態隨機存取記憶體)市場，導致出現供不應求嘅情況，令利基型DRAM產品量價齊升。此外，集團持有內地記憶體龍頭長鑫科技1.8%，長鑫科技除製造DRAM，亦有進軍HBM市場及推進A股上市，對兆易創新來講係咪正面催化劑？
方德證券高級分析師李浩然指，港股嘅存儲型或半導體相關股比例唔算高，兆易創新可以跟外圍潮流去炒，所以股價表現較強勢。佢又話，海外大廠如三星電子(Samsung Electronics)及SK海力士(SK Hynix)退出利基型DRAM市場，令長鑫喺呢段時間搶咗唔少定單，加上內地嚟緊會傾向用國產晶片，所以做DRAM晶片設計嘅兆易創新喺呢段時間都可以受惠。
不過，Eric提醒，若長鑫真係喺A股上市，市場焦點可能會被長鑫搶去。
