【Now財經台】內地訪客保險業務(MCV)係保險公司好重要嘅保費、新業務價值來源，不過，近日內地當局打撃跨境炒股，保險股都遭殃，其中，友邦保險(01299)股價今日一度重挫6.7%，低見76.7元，內地打擊跨境炒股「加辣」，會唔會燒埋MCV？
艾德金融執行董事陳政深認為，依家整體大市氣氛差，加上內地收緊境外投資，拖累友邦捱沽，股價插水。佢又提及，市場憂慮或始自中證監限制跨境炒股活動，加上外管局規定個人每年5萬美元結匯及購匯額度，係唔包括投資型保險及海外儲蓄等，難免令人揣測未來會再收緊。
Ryan續指，由於同行保誠(02378)嘅內地客佔比大，投資者可能擔心喺香港上市嘅保險公司，十分依賴內地客戶，不過，香港保險公司新業務價值利潤率高過內地同業，意味前者競爭力仍大，投資者可留意友邦股價會唔會跌穿今年低位，即75.1元，之後再作部署。
