【Now財經台】澳門昨日(1日)出咗賭收數據，表現好過預期，摩根士丹利話，主要係市場之前下調咗預測，似乎唔係特別睇好。賭股方面，今年以來表現都麻麻，近期連日造好後，利好因素係咪已反映得七七八八？
天風國際李偉傑指，賭股昨日彈高，今日(2日)繼續升，今年單數月份賭收普遍維持喺226億澳門元以上，因此，5月賭收達226.1億澳門元，已算係偏高水平，雖然好過市場預期，但唔算有太大驚喜，加上世界盃好快就開鑼，可能會對賭收有影響。
Jason又話，今年1月澳門賭收都係約226億澳門元，當時數據公布後，賭股即時有反應，再配合市況造好，不過，股價之後喺冇乜消息下跌返落去，主要受大市及經濟預期影響，投資者可以留意嚟緊嘅博彩收入，可唔可以突破226億澳門元呢個今年高位。
佢補充，賭股近期冇明確方向，不如揀返較高息，兩者都喺差唔多嘅波動區間，一旦股價回落﹐高息股至少有股息做防守，所以金沙中國(01928)及永利澳門(01128)都係唔錯嘅選擇。
