【Now財經台】騰訊控股(00700)昨日(21日)喺會議上推出新人工智能(AI)功能，但股價收市仍挫逾3%，再跌至逾1年低位，集團喺收市後做回購，但股價今朝(22日)彈力唔強，高開0.6%後，升幅一度擴大至1.3%，高見445元，之升幅收窄。雖然騰訊股價冇乜起色，但好友繼續入場，5日合計，好倉有5570萬元坐貨，繼續係資金流入最多個股，騰訊昨日急跌，好友有冇再加大撈貨力度？還是投降？
法興證券上市產品銷售部董事蔡秀虹指，騰訊股價持續弱勢，見到好倉產品不斷有資金流入，吼低位部署反彈，CALL輪及牛證昨日分別有逾2000萬元資金淨流入。
佢又話，今朝交投比較暢旺嘅產品，CALL輪方面，主要集中喺行使價580元至590元，9月至11月到期，實際槓桿9倍至10倍。牛證方面，由於股價持續向下，都要小心收回風險，距離現貨價7%至9%，槓桿9倍至10倍。
