【Now財經台】東涌第106A區臨海住宅地皮由承造政府項目，例如啟德啟欣苑、屯門公營房屋等嘅安保工程控股(01627)爆冷投得，今次入標以中小型發展商為主，當中有咩啟示？值得留意係，呢幅地皮每呎地價，較新鴻基地產(00016)約1年前投得嘅106B區臨海住宅地皮貴1倍，有咩因素推高地價，係咪同近期樓價上升有關？
仲量聯行估價諮詢部主管區建強指，擴展區周邊的確有唔少地盤，生活配套及交通方面，最快可能要等東涌東站2029年落成才更完善，暫時都要去東涌，甚至出九龍購買生活用品。
地價方面，佢認為同樓價息息相關，近期本港樓市氣氛好轉，對地價會正面作用，加上發展商看好項目前景自然投入更多，而今次參與嘅大型發展商較少，可能係考慮到新區未來或有更多地皮供應。
