【Now財經台】半新股兆威機電(02692)股價今日(15日)最多升近20%，市場相信，可能同資金正炒緊內地近期嘅「靈巧手」，即「人性機械手」概念，雖然兆威第1季業績睇唔到有太大憧憬，但旗下有公司專門做呢項業務，點睇集團投資價值？
王道資本及家族資產管理執行董事黃敏碩表示，整個機械人概念股板塊中，較睇好可以做到細分化，以及主打高端項目嘅企業，例如應用喺醫療等專業領域嘅機械技術，對比一般嘅基層服務型機械人，更具優勢及針對性。
佢又話，就兆威嚟講，若「靈巧手」產品上能真正做到高度細分，精密程度及仔細度夠高，發展潛力會好大。
投資部署方面，Michael指，以兆威現價的確有條件追落後及炒上，但中長線而言，最重要係觀察公司市場集中度，以及整個行業嘅技術門檻係咪夠高，因為可以阻擋後續競爭對手加入，市場亦會關注兆威資本開支，可唔可以幫到公司維持市佔率。
佢續指，若市場對呢啲基本面嘅信心逐漸恢復，今日嘅升勢可能係一個開端，後續有望形成穩步上揚格局，建議投資者可以將兆威納入觀察名單，有貨嘅投資者現階段不妨繼續持有，再作進一步觀望。
